Joan zan nere maitea,

         Aldendu zan aiezka...

Geroztik gau eta egun

         Beti haren galdezka...

         Beldur naiz hil ote dan

         Hauxen da nere kezka!

Liraina ta polita zan

         Nere maite kutuna.

Neskatil zoragarria,

         Lore eder usaiduna.

         Harrokeri gabeko

         Emakume biguna.

Alkarrekin ginanean

         Oi, nere zoriona!

Bihotzez laztantzen ginan

         Hori zan maitasuna!

         Pozik igarotzen nun

         Gaua eta eguna.

Geroztik nahigabez nago

         Lagun gabe bakarrik.

Beti beretzaz oldozten

         Ote dagon bizirik...

         Urrinera begira,

         Maitea ikusi nahirik!

Maite gabe ezin bizi naiz

         Bihotza oinazetan...

Euzki eder hori gabe

         Beti nago ilunpetan...

         Negua dut nerekin...

         Hilko naiz elurretan!!!

                                                    Baiona’n Herriak antolatutako sariketan

                                                    1954’go urtean, sariztutako olerkia.