Begi igartezin, begi aundiok,

 Itsas-Ortzeak lez sakon ta aratzak,

 Andes'etako oian, bardin begiok:

 Geltsu, amesezko ta ilunez baltzak...

 

 Begion betazpi gogatsuetan

 Atsekabe isilen lorratza dager,

 Ondar gazian lez, lekaroetan

 Doan itsas-uinan erratza alaber.

 

 Betikoz maiteki adi naizue,

 Begi eder, betsein sotorroindunak,

 Bekoki azpitik dirudizue

 Osin ur aundiok eta bigunak.

 

 Adi ba maiteki, begi apainez

 Eguzki bi, buru edergarriak,

 Ta bere ezpan gordin gorrien gainez

 Dirudizuez lor-leiza larriak.

 

 Adi ba maiteki, begi islatsuok,

 Ta ni iltean, maite zauedaz ainbat!

 Nere uzkin zurian izuri zuok

 Negarmin malkoen uial ezti bat.