UA... UA...!

                        Irratizkiñez,

                        radioz, enana

    Ua, ua emendik, otsa!

abil azkar, pizkor, abotsa!

Gure izkuntzen agur laztana,

ludiko euskeldun danorengana

ortxe dijua..

Ua... ua...!

    Eusko erriko anai danori

eman akiok laztan beroa.

Bere barrendik irtendakoa

dek gaurko oyua:        .

Ua... ua...!

                * * *

    Napar erriak bere elean

gaur entzungo dik dei anaikorra,

joari azkar, abots pizkorra!

An maite aute biotz betean.

    Bizkai aldeko anai leiala

ire zai zeok, abots nerea.

Esan akiok izkuntz maitea

betiro pisten ari gerala.

    Joari arin, egazka, bizi,

arabatarren biotz erdira,

oyu egiñaz: garaiak dira:

ire izkuntza dek lendebizi!

    Zuberotara, ernai dagona,

abil laxterka! ire zai ziok.

Laburdikoaz maitatuz biok

egingo ditek arrera ona.

    Mendi, erreka, zear or ua

oyuz beteaz bazter guziok;

eusko irrintzi alai dagiok,

gure eleko santzo berua.

Ua... ua... !

    Itsas barean edo larrian

dabillen eusko arrantzalea

agurtu ezak, abots nerea.

Lagun akiok bere lanian.

    Agur! esaiok, mendi gañean

dagoen eusko artzaitxoari.

Itxaropenez azkar joari,

abil abotza egiñalean!

    Egun-sentia ta illun-abarra

ikus oi duan nekazaria,

oitura oneko gizon garbia

agurtu ezak, abots azkarra.

    Agur! esaiok seaska ondoan

abots ixillez kutuntxoari

abesten dion ama onari.

Eusko seme bat zeukak alboan!

    Aiton ximurra urteen zamak

makurtu duan zar atsegiña

agurtu ezak. Geure alegiña

ta itxaropena eorrek damak.

    Eusko erriko enparantzetan

jolas dabillen umetxoari,

oyu nerea, urrera ari

ta agurtu ezak bene-benetan.

    Ez adi aztu aundikiaren

jauregi apaña barrun sartzea,

ta beartu zak gure elea 

alde orotan ibiltzearren.

    Erbesteratu duten anaia

pozkidatu zak, bidazki otsa.

Josita daukan arantz zorrotza

azkar kentzea da, gure naia.

    Agur! esaiok eusko orori,

aberatz, txiro, zar ta gaztea,

emaiok azkar, abots nerea,

agur bero bat anai danori.

                * * *

    Ua, ua emendik, otsa!

Abil azkar, pizkor, abotsa!

Gure izkuntzen agur laztana

ludiko euskeldun danorengana

ortxe dijua.

Ua... ua...!

1932-3-2