UDAZKEN BATEZ ATERPE

 

 

1.

 

Hodei alderraien

      zorabio eranitzezko gangari so:

              udaren azken arnasaren

                  kopa beteegiaren umotasuna.

 

      Liztor-burrunbadaz hanturiko masustondoak

                   ibar-zoko makalduaren

                          ezponda jorietan

 

      Gogoeta atezatu trumiltsuak

                   baketsu behar omen lukeen

                           isiltasun xuxurlatian.

 

                   Gogo-jardun lohi-olatarren aztura mingotsa

                       baretze totelaren ezabagarri.

 

              Bego.Mintza, bada.

              Bekit mintzoa

              hutsartearen gaineko unama

              isil-holtzaren gaindi zabukari

                                    naramana.

 

 

2.

 

Zozo moko-hori goseztoak

              larrainik larrain

              adaskaz adaska:

                    hegada beltz lasterra egin du

                                         Horko horrek

                        eta kanpandorre lerdena hartu

                                       pausaleku gotor

                                  gotor bezain iragankor.

 

               Eta argia.

               Eta eguratsa.

               Eta bizia.

 

                        Aineki tasunk gabeko

                                  unea dastatzen.

                        Ainendi aienerik gabe aiena.

 

 

3.

 

Umotu dira pikuak.

                     Lur-zorua

                         intxaurrez ihaurri

 

                               (Mamitsuak dasta.

                                  Bihotzean muindunak.

                               Makestuak bazter

                                  Barren-huts mikaztunak)

 

                          Hitz-zuztar xehetua

                              gera bedi

                          lekukotasun arrasto bakar

 

 

4.

 

Ametzen adaburuak euripean

      haizearen peko intziri.

 

                Arteen azal hezea kilimakur

                            gurari zaharren ikur.

 

                       Samur Beldur...

 

                       Ez.Ez gara bionbo zuri,

                       itzal txineskoen antzeztoki

                                      huts.

 

 

5.

 

Ezkila arrats-mezulari goiztar

        eta azken errainu ilunabartarrak

        irribarre bare argitsuaren ekarle, ene

        barne-ahots batek xuxurla diraustala:

          «Ez garbatu iragana, ez kezkatu etorkizunaz.

                Bosnia-Herzegovina bana gara denok

                hiru Estatu ustez bakarrean banatuak.

                Eta alferrik bidaliko ditugu gure onu-unoko

                indar parapolizialak Crska Errepublikara

                Srebenica gogoan hango gerra-kriminalen bila.

                Bakea da irabazi beharrekoa, ez justiziaz mozo-

                rroturiko mendekua. Eta, horretarako, suntsitu

                egin behar duzu zeure zama zurrun hori, zeure

                buruaren borrero izanarazten zaituena (eta inoiz

                beharbada besteren ere bihurtaraz zintzakeena)»

 

 

6.

 

Erauzgaitza

       nolanahi ere den

       oroimenari itsatsia

               ohi dirakigun

               ohi diraukigun

             mintz-geruza anabastua

                       idazketak

                           igurtziaren igurtziz

                                                gorbiztua.

 

             Leihotik barnera soa bilduz:

                  gela ilun ausiabartuan

             adreilu eta azuleiu zati

                         erdi-birrinduak:

                  hitzen haustura

                         berba noiz egingo

             ibilian dabilen

                  liztor-zorabio menderagaitza.

 

             Aspaldiko ezpalez josia

                  arestiko azalez estalia

                                        ene hitza beti

                                                dena den.