LEHEN PHEREDIKIA

 

Agur zier, jente hunak,

salduan beitzide jinik

Heben guri behatzera

hala nula aitzinetik.

 

Bethi begira dezagün

jei zaharren amodiua,

Hola eginen beitügü

Uskal-Herriaren gerua.

 

Ibañetako ixtoria

guretako berhezia,

Orotan orai artino

ükhen dü aiphü handia.

 

Diala hamabi mente

Karles Frankuen erregia

Gure indarrez mendian

izan zen oso lehertia.

 

Aripen horren ttipitzeko

Frankuek, gützaz Uskaldünez,

Hedatü zien fama gaixto

egia gorde beharrez.

 

Gero ixtoria faltsiak

Europako herrietan

Zütien ager-erazi

Franko haien uhuretan.

 

Bena gük egia nahiz

libra zaharrak ikhertü,

Eskolan beno hobeki

ikhusi zer zen agitü.

 

Ordian Karles Handia

Frankuen bürüzagia

Nahian zen erresuma

izan ledin hedatia.

 

Urthe oroz güdüka bat

egiten zian han edo hor,

Bethi mügen hürrüntzeko

ezpeitzian hartzen opor.

 

Pépin le Bref-en ondotik

hamar urthe nausi zela,

Urthe-büria handizki

markatü behar ziala.

 

Zazpi ehün ta hirutan

hogei ta hamazortzian,

Armada handi bateki

sartzen da Uskal-Herrian.

 

Mauro saltzale zunbaitek

zien Karlesi errana

Paderborneko bilkhüran

Zaldüba zela harena.

 

Tolosatik adar batak

aisa hartzen dü Barkino,

Eta bestia ordian

heltzen Zaldüba artino.

 

Abd-ar-Rahmanen Mauruek

Uskaldüneki batian

Karlesen bullta handia

zien etxeki heiñian.

 

Ordüko Otso-Zantxezek,

Uskal Düke Erregiak,

Arrunt hitzartü zütian

bühürt litian Uskaldünak.

 

Basak bezala Frankuak

Iruinea Hiriala

Zalhe ützültzen dirade

itxuski mendekatzera.

 

Otso-Zantxezi jarraikiz

bürü hartürik Iñigo,

Uskal-Herriko gizonak

haidü dira hürrünago.

 

Agorrilako beruan

Andere Dona Mariaz,

Karlesek dü Ibañeta

gaintitzen bere armadaz.

 

Uskaldünek joiten die

han gibeleko armada,

Hartüz therreilka bezala

Frankuer emaiten johada.

 

Aitzindari handienak

hor dirade egotxirik,

Erresumako Zaldünak

botxien pian hartürik.

 

Aralde ttipi bateki

harritürik gure Karles,

Lagünak hantxe ützirik

zalhexko badua ibes.

 

Hergaraia, Urrütia,

Izpurra eta Izurra

Iganik ürhatsa arhin

Juan zaikü gordatzera.

 

Egiaren jakida

Ordü da guretzat egün,

Ibañetan agitia

Goraki aipha dezagün.