II. SAMBA

(Argi gorriak laster galduko du bere izaera eta pertsonaiak gor-

putzaren bidez jarrera berriak bilatzen dituen artean, urdinera

egingo du, argira lehenik, kasik zurira, intentsitate urdina hartze-

ko pixkanaka oraingoan.

Pertsonaiak bere eskubiko aldera begira hitz egiten du, han berak

esaten duena entzuten ez duen beste pertsonaia bat egongo balitz

bezala).

NIK EZ DIZUT ESANGO

                  munduaren neurria zein den

                  ustelduta zeudela itxaropenaren erraiak

        itxaroten hasi baino lehen

NIK EZ DIZUT ESANGO

                  ulertzen dudala zure mina

                  ez baititut gogoko gezurtiak

NIK EZ DIZUT ESANGO

                  erbestera bidali dizkigutela

                  politika liburuak

        nire herrian bada

                  babes ofizialeko liburutegi bat

NIK EZ DIZUT ESANGO, EZ,

                    min ematen didala zure begirada

                    abegikorrak

        nirea behar lukeelako eta ez zurea

                    begi zoroen aberri askea

NIK EZ DIZUT ESANGO

                    esatearen beldur naizelako

                    gure arteko burbuila ez ote den hautsiko

        iraganeko atlas zaharkituen pareko

JAKIN BADAKIT

                    beste egoera batean

                    lagun hurkoa ginatekeela

        kafe bat hartuko genukeela

                                    bizitza mintzagai

                    orain CDak salgai jartzen dizkidazun

        mahai honetan bertan

HALA ERE NIK

          ez dizut esango

                  EZER EZ

                  egungo gizarte maila berriez jabetzea

                  litzatekeelako

          liburuak irakurtzeak, poesia idazteak

                  eta ezkertiarra izateak suposatzen duen

          pribilegio izugarriaz

                  jabetzea litzatekeelako

HORREGATIK

        EZ DIZUT ESANGO

                  munduaren neurria zein den

                  ustelduta zeudela itxaropenaren erraiak

        itxaroten hasi baino lehen