JONASEN LIBRIA

BÜRÜ I.

Jonas Ninibara igorriak ihes egiten dü, eta untzi batetan sarthürik, itxasoz badua. Tenpesta batek irailtzen dü itxason barna.

        1. Jauna mintzatü zen Jonas Amathiaren semiari, erraiten zeiolarik:

        2. Zuaza orai Ninibako hiri handiala, eta han barrei'ezazü ene elhia, hanko gaxtokeria altxatü beita ene gan'artino.

        3. Jonas jarri zen, arren, bidian; bena goguala jin zeion Tharsiserat juaitia, Jaunaren aitzinetik ihes egiteko. Eraitsi zen Joppera, eta edirenik Tharsiserat abian zen untzi bat, hartan sarthü zen bestekila, eta phakatü zien hiri hartarat igaraiteko saria, Jaunaren aitzinetik ihes egiteko.

        4. Bena Jaunak igorri zien itxas gaña aize oldartü bat, eta tenpesta handi bat jinik untzia phorrokatzeko perillian zen.

        5. Mariñelak lotsatürik, oihüz deith egiten hasi ziren Jinkuari, eta karga urthuki züten itxasualat, untziaren arhintzeko. Jonas hatik, untzi zolala eraitsirik, han tinki lo zaguen.

        6. Haren gana hüllantürik, untzi zañak erran zeion: Nula egiten ahal düzü lo? Jaiki zite, deith egizü zure Jinkuari; bentüraz orhitüko beita gützaz, eta ezpeitüke nahi hil gitien.

        7. Erran züten gero algarren artian: Ikhertü behar dügü zorthia, jakiteko nuntik gaitz hau horra zaikün; eta zorthia urthukirik erori zen Jonasen gaña.

        8. Galthatü zeioen, arren: Erran ezagüzü zerk gütien perill huntan ezarri. Zer ofizio düzü? Nunko zira? Nuat zuaza? Zuñ da zure herria?

        9. Ihardetsi zeien: Hebrear nüzie, eta zelüko Jinko Jauna, itxasua eta lürra egin tiena, zerbütxatzen dit.

        10. Ordian, lotseri handi batetan sarthürik, erran zeioen: Zertako hola egin düzü? Jakin beitzüten bera ganik Jaunaren aitzinetik ihesi zuala.

        11. Erran zeioen, arren: Zer egin behar deizügü itxasoko bulltetarik gure begiratzeko? Ühinak goratzen ziren eta lodiagotzen.

        12. Jonasek ihardetsi zeien: Har eta urthuk nezazie itxasualat eta ematüren da. Badakit ni nizalakoz tenpesta hau jin dela ziren gaña.

        13. Mariñelek hatik lhü idorriala arrimatü nahi züten untzia, bena etzioten, itxasuak goratürik bere ühinez gordatzen zütielakoz.

        14. Oihüz, arren, erran züten Jinkuari: Othoitzen zütügü, Jauna, gizon hunen heriotziak ezkitzan galeraz, eta gaitzik egin eztien odola eztezazün gütan gaña eroreraz; zük nahi düzüna egiten beitüzü.

        15. Jonas hartürik urthuki züten itxasualat, eta behala ematü zen.

        16. Jinkuarentako gürgarriko lotsa bat jarri zen gizon hoien goguan. Jaunari eskentü züzten hostia eli bat eta bere hitz emanak.

BÜRÜ II.

Arrañ batek iresten dü Jonas. Profetaren othoitzia. Itxas bazterrialat goit'urthukitzen dü arrañak.

        1. Jinkuak ordü berian igorri zien arrañ handi bat Jonasen irestera; hirur egünez eta hirur gaiez egon zen arrañaren tripan.

        2. Hantik Jinko Jaunari othoiez.

        3. Erraiten zeion: Oihü egin dit Jaunari ene bihotz-min handian, eta entzün nizü; hobi barnatik oihü egin deizüt, eta entzün düzü ene botza.

        4. Itxas barneko hur zolalano urthuki naizü; ald'orotarik büsti nüzü, züre ühinak oro gañetik igaran betzaiztan.

        5. Eta erran dit: zure begien aitzinetik urthukirik nüzü; bena hatik ikhusiren dit orano zure egongia sañtia.

        6. Hur pian nintzalarik, herioko müga ikhusi dit; hosinak ald'orotarik üngüratürik, itxas ühinek büria gañtitü ditazie.

        7. Eraitsi nüzü mendien erruetarano; lürretik kazatürik banintz bezala, ikhusten nüzü hur gaztelü huntan; hirokeriatik begiatzen deitazüt bizia, oi ene Jinko Jauna.

        8. Ene bihotz-min handian, Jauna, orhitü nüzü zützaz; igaran dadila ene othoitzia zütara, zure egongia sañtiala.

        9. Ezdeuskerier jarraiki zalek, üzten dizie ürrikia soltazalia.

        10. Nik hatik eskentüko deitzüt sakrifiziuak laidoriozko kantikekila; Jaunari erranen ditit salbatzeko hitzaman dütüdanak oro.

        11. Ordian arrañari Jaunak manhatürik goit'urthukitzez Jonas, urthuki zien itxas bazterriala.

BÜRÜ III.

Jonasek banatzen dü Ninibako arrabaskia. Ninibarrek penitenzia eginik, Jinkuak pharkatzen dieie.

        1. Beste aldi batez Jauna minzatü zen Jonasi, erraiten zeiolarik:

        2. Zuaza orai Ninibako hiri handiala eta han barreia ezazü manhatü deizüdana.

        3. Jaunak manhatü bezala, juan zen Jonas Niniba hirur egünen bideko hiri handiala.

        4. Eta han sarthürik egün batez ebili zen, oihüz ziuelarik: Berrogei egünen barnen Niniba arrabaskatürik date.

        5. Ninibarrek Jinkuan sinhetsirik, manhatü züten orok barur egin zezen, eta zakiak jauntsi züzten, handienek eta txipienek.

        6. Berri hori jakin unduan erregek, jaiki zen bere tronotik eta arropak bilaizirik, jauntsi zien zakü bat eta hauts gañen jarri zen.

        7. Oihüz gero jakin erazi zien Ninibako bazter orotan erregeren eta printzen manü hau: Gizonek, zamariek, idiek eta ardiek eztezela deus jan; eztitiela bazkagialat juan, eta eztezela edan.

        8. Gizonak eta aberiak egon ditiela zaküz estalirik, eta ahal oroz oihü egin dezela Jaunari; bakoitxak, haren ganat ützülirik, ütz dezala gaizkiko bidia, eta eskiak theiütü deitzon gaxtokeria.

        9. Nurk daki Jaunak ezteikünez pharkatüko, ematüren eztienez bere khexü borthitza, eta khanbiratüren eztienez gure galtzeko eman dien mania?

        10. Haien egitater behatürik, Ginkuak ikhusi zien, gaizkiko bidia ützirik haren ganat ützüli zirela; eta haiez ürrikaltürik igorri nahi zeitzen gaitzak etzeitzen igorri.

BÜRÜ IV.

Jonas bihotz minetan dago haren errana eztelakoz egin. Jaunak enthelegerazten deio eztiela ükhen behar bihotz minik Niniba eztelakoz galdü.

        1. Ordian Jonas bihotz min handi batek hartürik khexatü zen:

        2. Eta Jaunari erran zeion: Eniena hola erraiten ene herrian nintzalarik orano? Hortakoz goguan hartü nizün Tharsiserat juaitia. Banakizün Jinko ezti, hun, lüzakor, ürrikalsü bat zinela, eta bekhatiak pharkatzen zünütiela.

        3. Othoitzen zütüt arren, Jauna, khorpitzetik idok'ezadazüt orai arima, hiltzia bizia beno nahiago beitüt.

        4. Ihardetsi zeion Jaunak: Uste düzia khexatzeko arrazu zunbait badüzüla?

        5. Ninibatik jalkhirik, goizeko aldian jarri zen Jonas, eta han heipe egin zien batetan phausatü zen, hirian zer heltüren zen jakin artino.

        6. Ordian Jinko Jaunak sortherazi zien, Jonasen bürü gañetik, hüntz osto undobat, itzal egile bat, haren heipian egon ahal zadin, beruak akhitürik beitzen; eta Jonas alageratü zen.

        7. Biharameneko argi hastian, Jaunak igorri zien har batek xilatürik, hüntz osto undua eihartü zen.

        8. Gero ekhia agertü zenian, süzko aize bero bat Jaunak eraik'erazirik, Jonas ekhi pian ükho zaguen, hatsik ezpeitziuen har, eta hil nahitü zen, erraiten zielarik: Bizi beno nahiago niz hil.

        9. Jaunak erran zeion ordian: Uste düzia arrazu zunbait badüzüla hüntz osto horren kuntra khexatzeko? Jonasek ihardetsi zeion: Bai, bai, arrazu badit khexatzeko, eta hil nahitzeko ere.

        10. Jaunak erran zeion: Khexatzen zira, dohañik, zük lagüntü gabe, gai batez sorthü eta handitü zaizün hüntz osto baten kuntra, biharamen gaiian hil zaizülakoz.

        11. Eta nik eniokezü pharka Niniba hiri handiari, hanko seitan hogei mila jenter, eskü esküña exkerretik ezagützen eztiener, eta abere salduer?