Poema debotuak

Kepa Lukas

—Katuaren poema—

Zaratez haruntzago itsas iraunkorra

Altzariak laztantzen somatu zaitut

Txirrita elektrikoen orenean

Ordubetez saiatu zara

Farolen nebulosa adatsatik uxatzen

Oi Bakardadea!

Ken iezaidazu bizkarretik

Zure musu jelatua.

—Neguberria—

Edertasuna libre balitz

bide ertzetan aurkituko genuke

katu lehertuen artean.

Gau amoltsuaren tximistak

ez dezan gure maitaldia urra.

Gure umeek

zintzo bana ditzaten goxokiak

gerokoaren logelan.

Udabete hontan

gogor deskargatzen du

bakearen ekaitzak.

—Alice Sardney-ri omenez—

Argiak ilun ditzan

egunaren ezinak.

Antzerki Man

              irri sorta begi berriei?

Banan itzazu bi kikara ketsuak.

Arin ezazu mahai ertzetako nekea.

Argia argi hutsa

              dena betetzen duena.

Antzerki Man

              gereziak ezpain berrietan ere?

Berriro egiozu barre

arratsaren ikusmen geldoari.

Hautsa pizten duen

argi osoaren harian

berriro lamiak?

—Lotarako kanta—

Lasterketa beroak zeruan lizarrak

Ilargiaren aintziran

Bular zurien islada

Otoitzera maitia binaka elkartu

Plazerrez koipatu behatzak.