Gaur izan da leherketa

Joakin Balentzia

Gaur izan da leherketa

iratzeak, mendi gorriska, begi astunak,

eguzkiaren besta udazken iheskor honetan.

Suge ezkutatuek ez zekiten zer egin,

edo bihotzean sartu edo aizkora inguratu;

errekak mugatzen zuen aukera zaila

amets sentikorrak igarriz.

Suizidioari buruzko solasa

irain huts bat zirudien honelako egun batean,

hiltzeko eskubidea, bizitzeko ezina;

zianuroa eta akabo, eskatu omen dute

zenbait estatu batuar gaztek

bukaera nuklearra baino lehen. Bapo,

zain ilunak moztu eta hegan egitera.

Usoak, tiroak, zeru haserrea,

eta barnean ardoa. Urtxintxa barre eginez,

zuhurra, ehiztariez hunkitzen da funtsean.

Eta nik, ikuskizun guzti honen aurrean,

harrapatu nahi dut hezetasun distiratsu honen zentzua,

hartzen desagertzea eta

haur ametsen zergatia.