Gutuna

Txusma Habyarimana
(Garziarena Kinja-Rwandesez)

Sekula santan ez nuen erantzun ez egunkari ez aldizkari batetara. Baina noizbait lehenengo aldia izan behar eta hementxe naukazue.

        Banuen Garziarena-ren berri lehenengo alea kaleratu aurretik. (...) Denetik irakurri ondoren, gustokoa, ez hainbestekoa, idazki ederrak... hara non topatzen naizen 4. aleko 2. orrialdeko Alizia Garziarenaren «Fotokopiagailuak akatu» artikuloarekin.

        Irakurri. Berrirakurri. Esaldiak jaso. Berriro irakurri. Lagunekin komentatu, eztabaidatu. Irakurri...

        Arazoen arrazoien bila gabiltzanean, erru guztiak «kanpoan» ikusten edo ikusi nahi ditugu: hau da, arazoaren errora hurbiltzen saiatu beharrean, azalkerietan geratzen gara.

        Uste dut, eta beste askok hala uste dute ere, gaur egungo komunikazio medioek frakasatu egin dutela, ez bait dute komunikatzen. Modu berean komunikazioa zabaltzeko, banatzeko bideak.

        Liburuen (diska etab... bezala) prezioa izugarri altua da. Egileak irabazten al du?

        Askotan esan ohi dugu: «Kulturak ez du preziorik», «Konpara ezazue beste gauzen prezioekin» (irakur janari-edariekin), «Euskal liburugintzak ez du tradiziorik», «Euskarazko irakurle gutxi dago»... eta beste hainbat topiko.

        Tira, gehiegi luzatu gabe (hau dena argitzeko asko luzatu beharko nuke baina) goazen harira:

        «Fotokopiagailuak akatu». Eta irrati-kasetak? Zeren, nork ez du diska-zintaren baten grabazioa? Eta litografiak? Argazki makinak? Etab...

        Non dago benetako errua? Munduko fotokopiagailuak apurtu ezkero, konponduko al litzateke arazoa? Ez! Prezio hauetan ez dago irakurtzaletasuna bultzatzerik.

        Inpresio, Editorial, Banatzaile. Guzti hauen lanak garestitzen du liburua. Horretan datza kontua. Bide berriak ausnartu beharra dago:

        Inpresioan, banatze prozesuan, ezagutze moduan... Guzti honek noski perspektiba aldaketa eskatzen du.

        Ez dut uste hitz hauek asko lagundu dezaketenik. Egokiago litzateke elkartu eta bide berri horiei ekin. Geuk eman beharko ditugu lehen urratsak, konponbidea ez bait dator kanpotik, ezta fotokopiagailuetatik.

Txusma Habyarimana
(Garziarena Kinja-Rwandesez)