—Olerti / Etxaniz'tar Nemesi'ren olerkiak—
Urumea
Nemesio Etxaniz
Zikin dator ibaia
kirats dariola,
sargoriak esnatzen
du aren ustela;
beroak astundu dit
garunen kaiola;
kakutik esegita
dut gauzen ajola.
Zikin dator ibaia,
sudurra minduaz;
paper-lantegi-urak
arraiak galduaz.
Soldadu-kuarteletan
goiz-turuta juaz,
esnatu naute, nere
loak ba-dijuaz.
Pozik ez du zabaldu
zelaietan intzak;
zeruko urdiña jan
dute laño beltzak;
ur loietan ispillu
ertzeko arantzak.
Zenbat naigabe zorrotz
dun gure biotzak!
|