ETA...
...besterik ez. Horixe izan zen dena: Herriak herri izan nahi zuela. Besterik ez. Horixe da dena: Herriak herri izan nahi duela. Bere izatea izanez zaindu ta endakatzen ez den herria herri izaten baita beti.
Herriak bera izan nahi zuen, izan nahi du, bera, bere betiko herritasun oso betean. Bera izan berean.
Erlearen antzera, askatasunez bizi nahi izan zuen, bizi nahi izan du, bizi nahi du, mendi tarteko haize garbitan lorerik lore hegan joan, eztia egin, jolastu... Baina ez zioten, ez diote, herri izaten uzten. Nork? Betikoek, hauzokoek.
Arranoak indarkeriaz bere hatzaparpetan duen erlea bezala zegoen, dago, herria, estu ta larri, arnasoska, garraisika, ito aginean, bere arrazoi osoa negarrez eta zotinka adieraziz. Baina ez zioten, ez diote, jaramonik egiten. Eta eztenkadaka hasi zen, ari da...
... eta arrazoiaren indar zuzena
indarraren arrazoi makurrez
okertu zutelako, dutelako,
eta arrazoiaren indar mailukaria
indarraren arrazoi mutuz
isildu zutelako, dutelako,
eta arrazoiaren indar distiratsua
indarraren arrazoi beltzez
ilundu zutelako, dutelako,
eta arrazoiaren indar bizia
indarraren arrazoi hilgarriz
hil zutelako, dutelako,
indarraren arrazoi desgizatua
amorru leherkorrez karrikan zehar,
arrazoiaren indar deuseztatuaren
hilobiko fenixaren odol hautsetan.
© Mikel Zarate