Gabonetako fantasia

 

1) Musika leun bat entzuten da. Errepikaren doinua har daiteke horretarako.

        2) Musika entzuten den bitartean, poetaren ahotsa entzuten da: «Mozkorraren zorabiozko kaiolan dago poeta. Koktel desgizatu bat edanarazi diote Gabon jaietako zorion agurren lelo etengabez: hauts, ke, gas, polbora ta odolezko koktela.

        Bi malko distiratsu ditu kantari begietan. Malkoen kolore dantzan Gabonetako fantasia bat. Fantasia mingotsean bozkariozko itxaropenaren guraria, bakezko askatasunaren ametsa».

        3) Musikaren hegadan, kantatzen hasten da poeta:

 

                         a)

                Ilunaren tristura

                txabola hotzean,

                bakardade mindura

                haurrak bihotzean.

                Bakarrik haur larria...,

                ondora sagua,

                sagua ta erbia,

                txakur ta katua.

 

                «Neguko ilunetan

                kale ta baserri,

                haur baten negarretan

                dator Eguberri.

                Abereen pozetan

                haurra irribarrez,

                maitasun ametsetan

                poeta negarrez.»

 

                         b)

                Katuak buztan leunez

                du haurra laztantzen,

                begi argitasunez

                iluna uxatzen.

                Txakurrak musuen suz

                berotzen du haurra,

                hortz zorrotzez uxatuz

                gauaren beldurra.

 

                «Neguko ilunetan

                kale ta baserri,

                haur baten negarretan

                dator Eguberri.

                Abereen pozetan

                haurra irribarrez,

                maitasun ametsetan

                poeta negarrez.»

 

                         d)

                Irrintzi gozo alaiz

                sagua kantari,

                kantuz sikatu nahiz

                negarra haurrari.

                Erbiak dantzaz dio

                ematen adore,

                haurraren bozkario

                itxaropen lore.

 

                «Neguko ilunetan

                kale ta baserri,

                haur baten negarretan

                dator Eguberri.

                Abereen pozetan

                haurra irribarrez,

                maitasun ametsetan

                poeta negarrez.»

 

        4) Berriz ere, hasierako musika leuna entzuten da. Eta zorion agurrak musikaren barnean: «Zorionak!», «Eguberri zoriontsuak!», «Aintza zeruetan Jainkoari eta bakea lurrean gogo oneko gizonei!», «Urte berri on!». Esaera berdintsuak hiru-lau hizkuntzatan oihukatuz ere buka daiteke Gabonetako fantasia hau.

 

 

© Mikel Zarate

 

 

"Utopiaren fantasian" liburua

"Mikel Zarate - Lan guztiak" orrialde nagusia