Pentsamentu txarra
Biloizkeriaz jantzi zuten
biloizkeria begitan duten
gizaxo itsuek.
Eta zuek
niri eman
aingeruen goizean.
Lirdinga ta likits
(grina txarraren bits),
pentsamentu txarra
bakarra
zen
orduan
irudimenaren
ziegan.
Maite-zoro,
egunoro,
jarri ninduen...,
ta biloiztu egin nuen,
bat-batean,
gizonen eguerdian.
Biloiztu egin nuen...,
ta biloizkeria kentzean,
dardara bihotzean,
naskagarri
ta izugarri
bihurtu zen
maiteena,
bat uste nuena
asko bai ziren:
Hau beheratzeko
gurari,
hori salatzeko
nahiari,
hura hiltzeko desio,
irudimenezko madarikazio...
Biloizik eraman diet
gizaxo itsuei,
biloizik ematen dizuet
zuei. |
© Mikel Zarate