Derioko kanposantuan

 

Hilerri hontako pake larrian

nire bihotza urduri,

ez dut nahi

hilotzen pake hilik.

 

Hemen ez dago

zapaltzaile ta zapaltzailerik,

berdinen ezberdintasunik,

ezertariko arriskurik.

Hemen ez diete zuriek

gorriak ikusiarazten

beltzei

edo gorriei.

Kale kutsatuen arteko

giza-artaldeen garraisirik

ez da entzuten;

burruka gorriaren

haserre saminik,

inbidi begiluze horiaren

erreminik,

maiteminduen sukarrik,

tradizioaren kontradiziorik,

euskara batuaren arazorik...,

ez dago hemen.

Pobrea ta aberatsa,

handia ta txikia,

zuria ta beltza,

ona ta gaiztoa...,

denak berdin.

Hemen ez du

ezer balio diruak,

jakituriak,

aginpideak...

 

Baina ez dut nahi

honelako pakerik,

pake hil larririk.

Pake bizia nahi dut.

 

 

© Mikel Zarate

 

 

"Higidura berdez" liburua

"Mikel Zarate - Lan guztiak" orrialde nagusia