Mozkortzen ez dena,

ez da poeta.

Etorri sortzailearen zorabioz

gizonez, emakumez, Jainkoz,

Jainkoz, emakumez, gizonez,

lurrez, urez, landarez, aberez,

haizez, lainoz, zeruz,

emakumez, gizonez, Jainkoz,

Jainkoz, gizonez, emakumez

mozkortzen ez dena,

ez da poeta.

Gizonez, emakumez, haurrez,

haurren aingerutasun xaloz,

gizarteko joan-etorri,

bizinahi, bizimin, minbizi,

asma, amets, itxaropen,

poz eta negarrez

mozkortzen ez dena,

ez da poeta.

Baserriko isiltasun barez,

kale arteko zarata larriz,

burruka ta besarkadaz,

gorroto ta maitasunez,

haginkada ta musuz,

izerdiz, odolez

mozkortzen ez dena,

ez da poeta.

Otsoak, sugeak, arratoiak

sortzen duen nazka ta beldurrez,

bonbak, kainoiak, metrailetak

sortzen duen nazka ta beldur ikara gogorrez,

behiak, ardiak, enarak

sortzen duen maitazarre ta bozkarioz,

astoak, burdiak, traktorak,

kamioiak, trenak, barkuak, abioiak

sortzen duen erosotasun ta atseginez

mozkortzen ez dena,

ez da poeta.

Zeru urdin ta izarren diztiraz,

laino zuri, gorri, beltzez,

haizearen amorru lakar ta laztan gozoz,

mendi ta lautaden berde udaberritsuz,

uraren garbidura kantari ta kutsadura hiletosoz,

suaren dantza berdin ezberdinez,

loreen kolore ta usain biziz,

lurraren sabel emankorrez

mozkortzen ez dena,

ez da poeta.

Jainkoz, gizonaz, emakumez,

egiaz, gezurrez, zalantzaz,

ederrez, itsusikeriaz,

askatasun garraisiz,

betikotasun gurariz,

etorri sortzailearen zorabiazko harriduraz

mozkortzen ez dena,

ez da poeta.