Oroitzapena
Maite izan nituen Narkis-en ispilu emeak;
bakardade gaztearen ustekeria hutsezko grinen
zorabio liluragarriz maite izan nituen,
bakarrezko maitakeriaren ametsetan.
Ezjakinen ausartziaz maite izan nituen
behean, goian eta aldamenean zeuden
ispilu ito kaltegarriak...
Baina zu, maite, zu etorri zinen nirera
iluntze gorri batean
ta apurtu egin zenidan beheko ispilua
ta leize beltz izugarri bat ikusi nuen
nire behearen behean.
Zu, ene maite, zu etorri zinen nirera
goiz berde batean
ta apurtu egin zenidan goiko ispilua
ta zeru urdin eder zabala ikusi nuen
nire goiaren goian.
Zu, ene maite kutun, zu etorri zinen nirera
eguerdi zuri batean
ta apurtu egin zenizkidan aldameneko ispiluak
ta zeu ikusi zindudan
elkartasunezko maitasun berriaren bozkario gozotan. |
© Mikel Zarate