Laugarren Triptikoa - Lo hartzen detanean

ORAINDIK ORAIN

 

Oraindik orain goiza gendun da,

hona berriro arratsa.

Ez da luzaro mugitu zala

udaberriren urratsa.

Eta berriro gainean degu

negu beltza.

 

Oraindik atzo ginan zu eta ni

ezagunak.

Bikote umo bihurtu gaitu

maitasunak.

Bainan laburtzen dihoazkigu

udazken egunak.

 

Oraindik orain jolasten gendun

amaren besoan.

Laster, ordea, behar gera gu

arbaso zaharren ondoan,

ama-lur bake gozoan.

 

Horla da gure bizitza:

hodei iheskorrak

ur gainean dagin

itzala bezela...

Biziaren biziz

aitortzen detela,

ispilu gaineko

hatsa naizela:

hutsa bezela.