Ilunpezale zeran hontz begi argiduna

gauerdiko negarti, txistulari ituna.

 

Zu zera zu eta ni zu, hau gure zoruna!

Beraz, nire txistua zure oihartzuna.

 

Ez ahaztu badezula lurrean laguna

gauero nire atean jo txistu biguna.

 

Ta zu isildu orduko han dezu erantzuna

gau guztian gu biok, ai, hura jarduna!

 

Gaua ihesi doa, badator eguna.

Itxi begiak... Utik mundu pozoiduna!

 

Ez degu nahi ikusi munduko lizuna...

Itxi begiak, itxi! Hator, gau iluna!