Otoitza
Jauna, isuri zure begien
maite dirdai bat;
argi ixil horren izpitxo bat sar
nere animan:
Lur hau haizeak harrotu duan
hauts eta zikin da.
Auzoko orroak... auzoan bitez,
Biok aspaldi
egin genizun esi estua
ez bedi jausi.
Biok gaitezan hemen barruan,
biok bakarrik:
neri begira zu, pakez, ta ni
maite liluraz zugan etzanik.
Ixil geldia gure, jarduna:
zeruruntz kea,
mendi artetik mur-mur gozoan
doan erreka,
edo arrano hego zabalen
hega bezela.
Gorputz, lokarriz lotu-lotuta
naukate etsaiak.
Bihotzak Zu nai, gorputzak lurra
biok indarka
gogorra dute. Zein garaile, nork
dezake asma?
Jauna, hesia zartatuz norbait
sartu baino len,
lokarria hautsi... Baina gu biok
gaiten alkarren.
Olerti, 1959-III, 138. orr.
© Felix Markiegi