Buru ta biotz
Bihotz, hatozkit. Bakarrik gaude.
Ixil geldia inguruan.
Leiho bi horiek itxi barrutik.
Geldi bedi lurra kanpoan.
Bion arteko jardun gozo hau
luzatuko ahal gaurkoan,
maite-minduen ase-ezinezko
ixil-hautuen ginoan.
Etxape baten biok bizi ta
ia ez gera ezagun;
nolaz duzu? auzoko izanik,
nolaz alkarren hain urrun?
Zu bide-zaitut bizi-kutxa nik:
Jainkoak lehen-egunean
lur-gizantz hari eman-bizia
nabaitu zenun unean,
bularrak behingoz puztu zenitun,
ta, aldiz, irauli emakor,
zabal zenien lagunai ere;
zuri beraz dizute zor
bizitz-arnasa. Geroztik hemen,
barnean zaitut nabari
jarmi ta jarrai ordutikako
bizitz-banatze lanari.
Bainan, ta nolaz dakizu ni noiz
nazun Maite'k ukitua,
ala ba-dudan kezka zitalik,
ala Poz'ek naun artua?
Alperrak jo antz, motel-motelik
zabilkit orain agian,
itsas geldian txalupa antzera;
gero lauoinka bizian,
basa-behor lez, punba ta punba
bular guzia astinduaz.
Nora bidean? Nori jarraituz?
Zeren bila halako suaz?
Nere gogaien aldatze-berri
norgandik duzu jakina?
Erakus, arren, bion arteko
zubi ezkutu sorgina.
Haize zakarrak zurrunbilloan
paper apurrak bezela,
jirabira itsu nahasi zoroan
hor narabiltzu nahi ala.
Or nonbait duzu amets-iturri,
negar-osina ere hurbil:
nere gogaien arauera arin
horietan ohi nuzu murgil.
Zuregandik dut eragin zoro,
nerez ez bait-naiz aldakor;
pake-giroa besotik, ba-dut
zuzen-ibil-bidetxior.
Oztopo bage nenbilke hortik
ez bazinduket barnean
irritsametsak margoz jantziaz
bide-okertze lanean.
Biok eskuak alkarri lotuz,
gaiten gaurgeroz lagun min;
bide-burua heldu-orduan
dukegu hortaz atsegin:
zuk ni argitzat izan nazazu
itsu zaranez ta ero;
ta, aldiz, altzoa nik otza izaki,
zu zaitzat nik indar, bero.
Egan, 1951-4, 29-30 orr.
© Felix Markiegi