Gero arte!
Hementxe zauzkat nere aurrean
goian gurutza; gero, zu
kopeta goian, begiak argi,
buru zintzoa beti zut,
gudari azkar garaile izaki
zertaz lotsa ez-paitezu.
Behean hizlari-saila, erdian
Euskadi-ikurra, min-pisuz
makil-erpina ezin harturik,
bestea aldean itzaltsu.
Lagunak oro zuri begira,
ta aldiz haiei begira zu.
Ez ziñudan nik inoiz ikusi,
zure hitz xalorik ez entzun;
ta halare etxeko zinan gurean,
ona gaur minez non nauzun.
Oro dakian zure gogoak
nere berri orain ba-du:
hamaika apari goxo eginak
gu biok... zure izkutun!
Biok ur baten edanak nunbait,
biok liburu bat ikus,
biok maite bat bihotz-erdian
biok Aita bat, ta anai gu,
lagun artean zuri begira
ni ikusteaz ez harritu.
Oraindik ere bost jardunaldi
egin beharrak gaituzu.
Itxoin apur bat, ba-noa laster,
agur, gero arte, lagun.
Gure ixil-hitzak entzuten, Jesus
bedeinkapen bat luzatuz,
besoak zabal, burua makur,
maite-altzoa zabalduz.
1933-III-28
Yakintza, 1933, 3. zkia., 187. orr.
© Felix Markiegi