GURE JAUN ELIXONDO ZENARI ORHITZAPEN BAT

                I

Asteharte arratsaldian orano oro osagarri

«Gai hun eta bihar artino» erran zeneikün orori

Astizken goiza jeikizen uduri oro batzarri

Txoriak khantan ari ziren bena zü ez iratzarri

                II

Heriotze traidore krüdela igaran zen arte hortan

Zützaz jelos zen zinelakoz hanitx gora uhuretan

Orai familia hortxek da zuri dolüz nigarretan

Eta haiñbeste adixkide harriturik doloretan

                III

Urthatsez zük egin suhetak ez dütügü ahatzeko

Esperantxaz betherik ziren de.nentzat urthe guziko

Posible deja! Zü haiñ afable! Zü haiñ hardit! Zü haiñ sentho

Gütarik phartitü zirela agurak egin ordüko

                IV

Zure bizi xüxena izan da etsenplü bat denentako

Leial zinen, bihotzez largo eta atrebitü laneko

Azken bi gerletan eginik balentia izigarriko

Kolonel gradian züntügün eta modest ezinago

                V

Batarzün berri bat sor ledin bethi aitzinin züntügün

Ezpiritüz haiñ zinen brillant orok ezagüt dezagün

Zunbat adixkide zünian ikhus zinioke egün

Zurekin lagün hun bat juran da eta nolako Eskualdün

                VI

Ah! ehortzeta dolorusa bena izigarrikua

Haiñbeste pheredikü eder - zuretzat azken adiuak

Haiñbeste banderan artian gure Eskual-Herrikua

Dolian dira zazpi probintziak berheziki Xiberua

                VII

Haiñbeste lan egin onduan orai badüzü phausia

Zure orhitzapen goxua denekdezagün begira

Satisfet juraiten ahal zira eginik obra handia

Oraikuan zure aldi zen nuiz dateke guria?

                VIII

Zü galdürik gure «Biltzarra» kolpatürik da bürütik

Krüdel zaikü bena zer egin: «aitzina» guatzan hargatik

«Aitzina» zük erran bezala zük erakutsi bidetik

Eta nihur duda ez dadin lagünt gitzatzü zelütik

                        Ahaide posible bat: «Ahaire deliziuz huntan...» nula eta

                        khantore huntan: «Haurka phenusa» (lumero 66).

© Etxahun-Iruri