ZURE UZTARPEKO
Gogoz onesten zaitut, Iaun agurgirria,
soinean artu baitut zure uztarria:
berorixe dut grina txarren lokarria,
iarritako zam(a) arin duket ekarria.
Ongi leporatzeko lotu dut edea,
gero ipurukoa leuntzeko nekea:
purpuxetez ederrik bekoki-aldea,
gainean ardi-larruz estali elea.
Burniz egin didazu ozka zuretarra,
suz erre biotza ta gaineko bizkarra:
marru egin nun arren, odol-kei-aparra
iarioan, Zeu zaitut nagusi bakarra.
Lur-etzeak irauliz, urratuz ildoa,
orrela betea dut betiko arloa:
atzean badabilkit mika sail saloa,
eztantzut eder zaidan basoko zozoa.
Onatx, adar baten gain lotu zait, pinpirrin
txori bat, nik ordea Zerau zaut. .naitemin:
okuntza-luberriak dario ke-lurrin,
kurriloak lerroan doaz egan arin.
Uztarpeko danaren adore bikaina!
aintzinetik zoazkit, zeruko Itzaina:
nagiak ar ba'naza, sar akuilu-gaina,
oiuz zizta nazazu, bizkortzeko aina.
Inoiz beldur enadin, zakizkit orain latz,
eztenka ta ziztaka, eten bage garratz:
zauritu bearrean baikaituzu beratz
sendatzen ta zerura eramaten aratz.
Biarritze'n 1960' gko. Azilak 22
© Iokin Zaitegi