BETIKO LAGUNA
Zelaiak argitan egiten du dirdai,
uda-eguzkia dabilkit beti-jai;
betargi ta pozik ioten dut noranai.
betiko laguna saieska dut iarrai.
Lagun bakana ta benetan iatorra
une baten etzait gertatu zoztorra:
geldiro ba'nabil, geldi dator orra,
iradu ba'noa arin da koxkorra.
Eguzkiak argi egitean soilik
lagun au alboan ikusten nuen nik.
Amestu er(e) ezin lagun obegorik.
gizartean ere gutxi alakorik.
Odei-ostartean eguzkiak kuku,
eta bat-batean laguna ostendu:
eguzkia berriz ozkarbian sortu
ta lagun sorgina berriro azaldu.
Arrats-apalean eguzkiak murgil.. .
laguna, erabat galdu aunat ixil;
Iluna kozkortuz. etxera naiz zurbil;
beltza egin didan, azkenik, neskatil
© Iokin Zaitegi