Hi haiz Axular,

berriro nire bakardadean.

Hainbeste hekian geroaz

ez baithuen mundu hau gustatzerik.

Zer mundu aurkitu duk

Sara-ko lurpean?

Bizitza laburra duk,

heriotza luze.

Ausaz han itzali duk

hire esperantza.

Nik bizitza maite diat,

ta hiltzea bildur.

Izarren begira noala

potzuan itotzeko bildur,

ez diat lurretik

jaso nahi begirik.

Berriz itzuliko al naizen

pentsatzen diat kalera noanean,

zubia ermo ote dagon,

su-itzalkirik ote den zinean.

Heriotzaren ur beltzak

bete dik pentsamentua.

Hik ba hekian bizitza bezain barruan

daramagula heriotza,

edo barruago.

Gure bizitza hezurreri erantsia

erantz dezagunean,

gure baitan zer gaituk

heriotza baizik geldituko?

III

© Joxe Azurmendi