Ilargitara

Ilargi bidean

ez dago lamina gaur

bidaztiaren zain.

Bular zuriak

agirian zituena,

lamina ixila, gordin.

Basotik aide beltzak

begiratzen gaitu.

Behorren aska likits

hostoz erdi betean

egarria ito

nuen, bainan

ez zegoen lamina ixila

bidaztiaren zain.

Eta luze nuen bidea.

Ta bihotza geldi bezala

zebiltzan gogoetak

ilargitara

bideren baten bila.

Urrungo artzanorak

zaunga aspertu, motel bat

abandonatu zuten.

Ilargiak ez du pozik,

ta ibiltzeak ez atsedenik,

hilargitara gaur,

ze, arratsean, mendirako

aldatzaren hasieran

tiroka josi dute, moralki,

askatasuna.

Eta mendiak beltz daude,

ta lamina negarrez

iturri zaharrean

entzuten den arren

ez dago gaur

bidaztiaren zain

ilea jario zuen

lamina zuria.

II

© Joxe Azurmendi