Aizkorri, biguna gaur

urrun dagoenaren oroimenean,

umearen begi harritueri

harri hintzaien bezain.

Ez duk itsasorik

hire oinetan. Erreka-pare merke bat.

Herria zegok,

herri umilaren lana,

Eliza, kanposantua.

Tristez oroitzeko haurtzaroa

zegok oraindik,

eskolara bidean, elizpean pelotari,

edo Ugatsera ur bila.

Bisutsa ta lainoa zegok,

ta noizean behin

goiznabarreko edur gorriztaren

gozo leuna.

Irautearen indarra zegok,

harri, aizkorri,

ta herri pobre bat.

Herri ona.

II

© Joxe Azurmendi