Suomenlinnan. Euriak

erdoitutako kainoen

ondoan

itsasoa dago.

Urrungo lurra,

aberrearen lur hausia

gogoratzen genuen.

Euskal Herriaren izena,

Kirsti, Euskal Herriaren izena

zetorren guganaino-ta

itsaso grisean

euriaren antsia maltsoarekin.

Askatasunaren gaztelu zaharra

—Suomenlinna—

euripean ez da gehiago

askatasun begirale.

Bere nekearen preso dago.

Eta itsasoa lo zegoen.

Lo Suomenlinna-ko

harri nobleak.

Haize bustiak

historia triste bat

zigun kontatzen,

xirimiri pean misterioz,

belarri edo

bihotzera,

ta guk ez genuen ulertu,

Kirsti, ez ulertu!

II

© Joxe Azurmendi