Via Appia

—Quo vadis? Nora zoaz, Jauna?

—Ba noa Erromatik,

ez dakit nora.

Berriz muntatu behar dut

haroztegia.

—Mundutik at, ausaz?

Munduan ez da gaur

egur garbirik,

gurutze batentzat ere.

Ba ditugu, ordea,

hainbat asmazio,

hainbat aurrerapen,

denak zure erregetzapean

lortuak.

—Nazaret-era noa,

berriz hasi behar dut

lantegi umil batetik.

Pobreak pobre dira,

ta zuek nire dohatasuna

ukatu diezue

langile deiturik

(ba dute, noski, lan

bizitzen!) .

Deitzen ikasi duzue

harriari ogi,

alferkeriari atseden,

grina goseari,

ta indarrari justizia.

Heriotzeari pake

deitzen asmatu duzue,

gezurrari prudentzia,

edo ta poesia...

Ba noa Erromatik.

Jainkoa asmatu behar dut.

Edo, beharbada, gizona.

II

© Joxe Azurmendi