Esaten dut:

heriotza.

Ta oihartzunak burlaz urrun:

hotza.

Esaten dut:

esperantza.

Bainan alperrik da

zeren oihartzunak ez baitaki

nire hitza.

(Zeren botanikak

ez du ezagutzen

lore klase hori

basoetan).

Esperantza:

ta gizonak

gelditzen zaizkit

begi ahoak zabalik.

Amesaren izena

ote da?

Ta neu ere gelditzen naiz

entenitu gabe:

fedegabe fraile,

frantziskano triste.

Herri baten amodioa

herri gabe.

Ausaz, esperantza

cha-cha-cha zimel bat

besterikan ez da.

Ebanjelioa ta gizonen mina

dantza bihurtu da.

Bainan udarekin

moda pasatu da,

ta esperantzarekin

esperantza.

I

© Joxe Azurmendi