Nazim Hikmet euskaraz

BIZITZEAZ BIA

Hala gertatzen da, konparazio baterako,

geisorik gaudela;

halako operazio gaitz bat suportatu behar dugula;

mahai zuritik jaikitzeko

ez dugula batere posibilidaderik.

Denboraz baino lehen joateko tristura ez sentitzeko

ezintasunean baldin bagaude ere,

azken gertaldiarekin barre egiteko parada ez dugu galduko,

leihotik begiratuko dugu,

ea denbora ederra dagoen,

urduri itxadoten ditugularik

izparringietako azken notiziak.

Hala gertatzen da, konparazio baterako,

frentean gaudela,

burrukatzeko gai den zerbaitengatik

burrukatzen dugula.

Atakea hasi bezain fite, lehen mugimenduan,

lurrera eror ahal gaitezke, era bertan hil.

Kemen paregabearekin onartu behar dugu hau,

eta hala eta guztiz ere

hainbeste eta hainbeste urtetan iraun ahal dezakeen

gerra honegatik

itsuki arduratu.

Hala gerta ahal diteke,

gartzelan gaudela.

hala gerta ahal diteke,

gure adina berrogeita hamarretara

heltzen dela,

eta burdinazko ateak zabal ditezen

beste hemezortzi falta direla.

Hala eta guztiz ere,

kanpokoekin bizi behar dugu,

gizonekin,

animaliekin,

ezinikusiekin

eta ekaitzekin,

hau da,

gure sufrikarioetako harresiaren atean dagoen

mundu kanpotarrarekin,

hau da,

berdin dugu non gauden

baina

inoiz hilen ez bagina bezala

bizi behar dugu.