Julen Kaltzada Ugalde (Busturia, Bizkaia, 1935eko uztailaren 18a - Busturia, 2017ko azaroaren 13a) euskarazko irakasle eta idazlea izan zen.
Abadetu ondoren Iurretan jarduera erlijiosoetan ibili zen. Frankismoaren aurkako mugimenduan ibilitakoa, hamabi urteko zigorrarekin kartzelaratu zuten garai hartan. Burgosko Prozesuan epaitu zuten 1970ean beste hamabost lagunekin batera eta ETAri laguntza eman izana leporatu zioten. 1976ko amnistiari esker askatu zuten, eta hurrrengo urteetan AEKko burukide moduan nabarmendu zen.

Mixel Thikoipe (Amendüze, Nafarroa Beherea, 1948 - 2017ko uztailaren 18a, Nafarroa Beherea) euskal idazle eta musikaria izan zen.

Martin Ugarte Azurmendi "Saletxe" (Legazpi, Gipuzkoa, 1916ko otsailaren 14a - 1996ko uztailaren 18a) euskal idazlea izan zen. Legazpiko Telleriarte auzoko Saletxe baserrian jaio eta bizi izan zen, eta handik datorkio goitizena.
Gaztetan artzain ibili zen aitarekin batera, eta, hamazazpi urte zituela, Legazpiko Patrizio Etxeberria lantegian sartu eta han egin zuen lan berrogei bat urtez. 1972an On egiñaren obaria izeneko eleberria argitaratu zuen. 1959 eta 1969 artean Olerti poesia aldizkarian eta Zeruko Argia aldizkarietan argitaratu zituen bere olerki eta idazlan gehienak. 1993an Legazpi barrutiko itzen bilduma argitaratu zuen, herriko hizkera, hiztegia eta adizkera biltzen dituena.

Odets, Clifford. Estatu Batuetako antzezle eta antzerkigilea (Filadelfia, 1906 - Hollywood, 1963). Antzezle moduan hasi zen lanean antzerkian, eta geroago antzerki lanak idazten hasi zen. Gizartearen kritika izan zen haren lanen ezaugarri nabarmenena eta 1930 ondoko urteetako idazle kritiko nagusietakoa izan zen Estatu Batuetan. Lan aipagarrienak: Waiting for Lefty (1935, Exkerra-ren zain), Awake and Sing (1935, Iratzar zaitez eta kanta ezazu), Golden Boy (1937, Urrezko mutila), The Big Knife (1949), The Country Girl (1950). Odets-en zenbait lan zinemarako moldatu dira.

Evtuxenko, Eugenio Alexandrovitx. Errusiako poeta (Zima, Siberia, 1933 - Tulsa, AEB, 2017). Sentiberatasun handiz, egunerokotasuneko gaiak erabiltzen zituen bere bertso malgu eta errimatuetan. 1952an argitaratu zuen bere lehen poema bilduma (Etorkizunaren aitzindariak), eta 1955ean bigarrena (Hirugarren elurtea). 1956an Neguko lekua eta Gartsuen Espaloia argitaratu zituen; 1957an Promesa eta 1960an Sagarra. 1965ean, sinbolismoaren inguruko eztabaidetan oinarritutako poema luze bat eman zuen argitara, Bratskeko Zentrala, eta beste bi poema: Errusiarrek gerra nahi ote dute eta Hesiaren ostean jendea marmarka ari da. Eragin handia izan du gazte sobietarren artean.

Austen, Jane. Idazle ingelesa (Steventon, Hampshire, 1775 - Winchester, 1817). Artzain protestante baten alabarik gazteena, 1805ean hasi zen idazten senide ugarien jolaserako. Lasaia eta orekatua, haren bizitza bezalakoa da Austenen eleberrigintza. Bere lanetan berak ongi ezaguturiko bizimoldea deskribatzen du, Hego Ingalaterrako nekazari goi-erdiko klaseari zegokiona alegia. Pertsonaien psikologiaren azalpen umoretsua eta zehatza da Austenen eleberrien alderdirik interesgarriena. Pride and Prejudice (1813), da haren umorezko maisu lana. Northanger Abbey, 1797an hasia eta hil ondoren argitaratua, 1818an, garaiko «eleberri beltza»ren satira da. Beste zenbait lan: Sense and Sensibility (1811), Mansfield Park (1814), Emma (1816), Persuasion (1818), Letters (1932).