Basajaun
Mujika, Luis M.
Basoan harro Basajaun,
sabel gogorrek zigormen
Aitzulo eta aterpeetan
mailu gaitzak dabiltze,
mahats-mordo suminduen
izuikarak zapore
(Basajaun, zure zangoak
handia luzamen,
harkaritz eskergek ere
izua dizute),
soro-landen zehar Basajaun
gari urrezkoen ereile,
gauero beso baldanaz
hilargiari kolpe...
Sugaar
Mujika, Luis M.
Ataun-go otabeltzetan
Sugaar-ek goragale,
arratsaren asmo gaitzak
su gorizko kare,
listu gori sei sugeek
(su horren oinaze!),
Ataun-go hibai-mendiak
sugarrezko labe,
Jaun Zuriak Bizkaian
Sugaarra emazte...
Herentsuge
Mujika, Luis M.
Herentsugeak edari
gauero burdin irakin,
Baltzola-n, eta Orduña-n
isatsez
zigorkatzen dabil...
Piztiaren erauntsiek mailu,
suge beltzak zazpi buru,
fosforo gaiztoek oihu,
zulo izkutuek mehatxu...
Itsasgorrietan ziplo
gordetzen da
izurdea antzo
(zenbat gizon jan dek,
esan, bart arratsez?),
itsas-olatuak harro,
urrunean gorrizko lauso...
Aih, Herentsuge,
hemendik alde...
Mikelats
Mujika, Luis M.
Mari-ren semeak
lurpean egarri,
lurpeko itsasoak
saltorik aunitz,
-Mikelats,
Mari-ren isatsa
nola duk hain handi,
Hodei ta Eate
atzetik
baloi gorriak
atzematetik,
baserri-atarietan
dizdiz oineztarri,
ekaitzen gurpila
gainbehera arinki...
Inguma
Mujika, Luis M.
Gauean biraka
Inguma ta Aideko,
Inguma-ren atzaparrak
zein gaitzezko,
gauaren maindirean
kezkarik franko,
-«amadre Santa Ana,
bart egin dut amets,
gaur gauez, ordea,
eizu ene partez»...
Hilargia gurean
Mujika, Luis M.
Ortze goian loguraz
hilargi-amandre,
bere eraginez gozo
gauzak emakume,
gau nagian argia
hildakoek more,
kanposantuan loa
argi ilunen mende,
gauzak oro gaupean
hatsa ta hilargite,
artoek lo makurra
soroetan berde,
zumarrondo ta haritzen
adarrek dolore,
neska hilargiari so
izorraren ustez,
eragin bizkorren hitsaz
izterpean suge,
hilargi-hilargipean
gauak gau-kolore...
|