Erein behar dugu

Zabaleta, Pedro Martin

 Erein behar dugu

 ama

 erein behar dugu

 erein egin behar dugu

 izarretan

 edo itxasoan

 zure oin hutsetan

 eta karriketan

 erein egin behar dugu

 itxaropen debekatuetan

 eta gure esku irikietan

 egungo gabean

 eta sortzeko geroan

 alde guztietan

 ama

 erein behar dugu

 gorputz apurtuen

 eta hiltzeko dagoen ahotsaren

 lur odolduaren

 eta altxatzen diren besoen koruaren

 arrazoia

 alde guztietan

 alde guztietan

 alde guztietan ama

 alde guztietan

 erein behar dugu

 bihar zoriontsuaren

 zihurtasuna

 zure bihotzaren losintxetan

 haur ororen begiak

 esperantza berritzen duten leku hortan

 bai ama

 behar dugu

 behar dugu erein

 askatasun bideetan

 Gernikako arbolaren

 hazi berria.

 ***

 Izarrekin etor ohi da

 eguna.

 Izarrekin joan ohi da

 eguna.

 Ta egunen ardatz ilargia.

 Eta izar eta ilargi

 denen jaun eguzkia.