Ikara

Zabaleta, Pedro Martin

 Ikaratzen da hostoa zuhaitzean

 aidearen indarrez.

 Ikaratzen da zaharra

 zahartasunaren indarrez.

 Ikara daiteke herri bat

 indarraren indarrez.

 Ikaratzen da bihotza

 zirrara maitez.

 Larritu daiteke norbait

 lotsaren eraginez.

 Ikaratzen naiz sarri

 hostoarekin

 zaharrarekin

 herriarekin

 bihotzarekin

 lotsarekin

 ikaratzen naiz nirekin.

 Hotza denean, hotza halakoa

 neguan bezalakoa

 sentitzen dut bizkarrean

 zirrara

 hotzaren ezten luzea

 ta jazten naiz.

 Droga bat hartzen dudanean

 edozein

 zigarrilo ta kafe ta kopa

 ikaratzen naiz

 kontzientziaren indarrez

 mamuak altxatzean

 oihalpean gordeta dauden

 haien jaikitzean.

 Ta lan egiten dut

 berriz saminki

 hotzikara sentitzean.

 Kehe bat sortzen da

 kehea

 ezea

 -bihotzak gizentzen ari zerate

 erahilketa egunerako-

 gorpu errearen usaia

 Gernika dut aurrean

 begietan.

 ***

 Agur.

 Oraindikan beroa daramat ezpainetan

 zuk emandako azkenengo musua.

 Ezpainetan dago oraindikan zintzilik.

 Ta joan zera agur esanaz

 betiko.

 Agur.

 Ondo izan,

 baina oraindikan nire ezpainak

 egongo dire luzatuak

 zure musu berriaren zai.