Osasunaz
Muniategi, Sabin
Eskergarria da bai, benetan,
norbera dan bat osasunaz
begiak argi, eguneratzea,
ta, bake santuan, gogo onaz,
bizi-poza begietaratzea
itxarozko pentsamentuetan.
Alaigarria da bai, pozgarri,
eskuak, oiñak ikututzea;
eskergarria burua argi
bizitzeko gogoz itzartzea;
uriko kale naiz baserrietan
buru zut, gizonkiro ibili
ta, zerbait gogoko izatea.
Zaratatsu ta, erabat biurri,
zurrunbillozko olatupean
ezinbiziz ergel ta urduri
or, etsaikerietan barrendua,
iraultzale gogoz, burrukari
dakusgunean gure mundua
erretxin, minudraz betea.
Benetan eder, atsegingarria
gorputza arinkiro zirkinduz
atzamarrak bere igitzea,
ta, egintzamenezko ikutuz
biotza ta eskuak goratzea
bizi-poza nun-naira edatuz.