Lore txoria
Muniategi, Sabin
I
Erabat baldarkiro eta sorgin
egan dakusgun lore-txori orri
zuk ze izen aukeratuko zenioke
albo-alboka ta goiberakari
ibilli oi dan orri, udaberrin,
uda, ta udazkenez ain dotore
beren margo ikusgarri, bitxiakin
zein izen aukeratuko zenduke
ikusiz lorez-lore ain pinpirin
nola dabillen ain begigarri?
II
Mitxeleta, tximeleta, inguma,
elguma, pitxillota, txipillota,
poxpolin, txiribiri, abokata,
txaketa, kalaputxi, txipileta,
mariapanpillon, pinpilinpauxa,
ingoma, mitxirrika, txipirrita,
asto arima, zeruko aingeru,
mandatari ta jainkoaren katu,
txirita, txibil-txori, txiribiri.
Ta, apex, sorgin-oilo, atximitxi,
triketa, axandalo, txilipitaņa,
makara, txitxu-papa, txilibili,
pinpirrin, sorgin-bitxi, txiribiri,
mitxirrika, tximilot, sorgindara,
matxita, atzalilli, txitximitxi,
txirrita, txinbeleta, mitxirrika,
pirtxillota, txiruliru, panpiņa,
Zein da zure gogoko lilirita
mitxelet izenik agurgarriena
zerubidezko zomorro maiteena?
Zein zure ametsen gogai iturri?
III
Ta, aintzina, baserri atarietan
umeen itaunai erantzun bearrez
itzak maitetasunak edertuak
kuntunkiro, gozoro sortu ziren
aintziņako amonen ezpanetan
berarizko argidura laztanez
Aunitz eratara antolatuak
izan ziran aintziņako amonen
irudimenari esker. Asetuak
izan ziran umeen egarriak
biotzezko izkuntza maitagarrienez
emanik erantzun argigarriak
uskeri, ta ezebeztzat zeuzkaten
zomorro pirtzillak iztegiratuz
berialaxe asmatuz itz berriak
euskerearen ekarri lilluratsuz