Mattinen omenez
Irigoien, Alfonso
Ahetzen zaigu zendu Mattin txoria,
txori kantari bizkor adoretsua,
irriparrez beterik barrengo sua,
euskaldun jende orok dugun zoria.
Gorpuari dario alai bertsua
-Nigarrik ez atera, erranik zinez,
alegera zaitezte irri eginez,
goibeltasuna date arrunt antzua.
Herria du beteko bere irrintzinez
urretxindorrak ere iratzarririk,
oihartzuna edonon indar berdinez.
Erneko du ostera gogo berririk
haizeak oro hatsez txertaturikan.
Ezin guk ur onari galdu egarririk.