Nire kolunpioaren

sokak luzatu ditut

ilargitik behera

          kulunkatzeko

soseguz, soseguz

                           (ilberria)

Bere habiarako

bitxirik distiratsuena

lortu nahirik

ilargiari mokoka

zebilen Pantxika mikak

nekatuta esan dit:

— Uztazu toki apur bat

zure kolunpioan—

Ipurdia alde batera

Pantxika mika buru gainera

                           (ilgora)

Bere erresumarako

egunik argitsuena

lortu nahirik

ilargiari eskeka,

zebilen Martzelino zaharrak

kezkatuta esan dit:

— Uztazu toki apur bat

zure kolunpioan—

Ipurdia alde batera

Martzelino zaharra bestera

                           (ilzarra)

Bere hodeientzako

gordelekurik paketsuena

lortu nahirik

ilargiari erreguka

zebilen Artzain tximistak

lasaituta esan dit:

— Uztazu toki apur bat

zure kolunpioan—

Ipurdia alde batera

Artzain tximista nire ondora

                           (ilbehera)

Nire lagunen

eskaerak ukatu ditut

ilargitik behera

          begiratzeko

zorabiatuz, zorabiatuz.

ilargiari, zer nolako poeta ote nintzateke ilargiari ez banio ezer eskainiko

© G. Arroyo