(III) ANASTASIA

Anastasia

Uztondoetan senarra artzain,

etxeko atarian eserita

goizean bildutako garbantzuak

poteetan sartzen

kiloko poteak, hiru pote.

Anastasia

Uztondoetan semea artzain,

sukaldeko ertzean okertuta

arratsaldean hartutako ganadu-barruak

plateretan jartzen

Arraza txakurrak, hiru txakur.

Anastasia

ilunabarretan begiak ernai

elizako aldarean makurtuta

udaberrian batutako pentsamenduak

lorontzietan oparitzen

Ama Birjinaren loreak, hiru lore.

Anastasia

Ilunabarretan bihotza ernai

bizitzako bidean nekatuta

urte luzeetan jasotako kontuak

tabernetan eskaintzen

Herriko tabernak, hiru taberna.

castillari larrainetan garia haizaratzen den bezala, imajinak airera botaz, geratu zaidan castillako hondarra duzue hau

© G. Arroyo