Zintzhilik aldizkaria 1985-86 ikasturtean jaio zen, Gasteizko Filologia eta Geografi-Historia fakultatean; hala ere, lehenengo zenbakiak ez zuen izenburu hori, Izenaren bila baizik: aldizkaria bizkor kaleratu nahi zen, eta erredakzio-taldeak ez zuen astirik izan egoki bat topatzeko. Ikasturte horretan bertan, beraz, beste "lehenengo" zenbaki bat osatu zen, Zintzhilik behin-betikoarekin; orduz geroztik ale bat kaleratu zen ikasturtero, 1994 arte (9. zenbakia, edo "10.a", bi 1. egon zirela kontuan hartuta).
        Zintzhilik Fakultateko ikasleen Euskara Batzordearen aldizkaria zen, eta hau datu inportantea da, horrek desberdindu baitzuen aurretik Fakultatean bertan sortutako beste literatur aldizkarietatik (Stultifera Navis, Kandela eta Fílulas de Cariaconcia): azken horiek erredakzio-talde nahikoa finko baten inguruan sortuak ziren eta, jakina, partaideek ikasketak amaitzean, desegiten ziren (zenbaki gutxi batzuk utzita); Zintzhilik, ordea, Euskara Batzordearen ikasturteko lehenengo bilerako lan-taldeen banaketaren ondorio zen, eta, hortaz, Euskara Batzordeak iraun zuen bitartean jarraitu zuen. Euskara Batzordea 1984-85 ikasturtean sortu zen, Fakultateko ikasle batzuen ekimenez, zentruaren euskalduntze-prozesua bultzatzeko asmoz (egoera negargarria zen garai haietan: euskal adarrik ez, soilik bost irakasgai euskaraz Euskal Filologiako karrera guztian zehar, hizkuntzaren ikusezintasun orobatekoa...). Alde horretatik, euskara hutsezko literatur aldizkariak, besteak beste, funtzio horiek bete nahi zituen: aipatu ikusezintasun hori murriztea, eta Fakultateko euskaldunen komunitatea trinkotzea.
        Eta horren guztiaren ondorio dira aldizkariaren berezitasunak: iraupena eta maiztasuna, erredakzio-talde finkorik eza, gorabeherak gaietan eta kalitatean, Fakultateko euskararen egoera konkretuarekin lotutako testuak eta atalak... Luzaroan, aldizkarirako literatur-lanak jasotzeko, posta-kutxa handi bat erabili zen, nahi zuenak bere ekarpena egin zezan (horregatik lan dezente izen soilaz eta ezizenez sinatuta daude, edo anonimoak dira); azkeneko garaietako testu batzuk, bestalde, Euskara Batzordeak berak deitutako literatur lehiaketaren bitartez biltzen ziren. Horretaz guztiaz gain, jakina, erredakzio-batzordeak taxututako testuak edo lortutako kolaborazioak argitaratzen ziren Zintzhilik-en.
        Lan gehienak, beraz, Fakultate bertako ikasleek (eta baita irakasle batzuek ere) idatzitakoak dira. Egileen artean (batzuetan ezizenez mozorroturik) aurki daiteke idazle ezagunik (gaur egun): Andolin Eguzkitza, Miel Anjel Elustondo, Xabier Etxaniz Erle, Vicent Gil de Paules, Gerardo Markuleta, Lourdes Oñederra, Jose Luis Padron, Juan Luis Zabala, Iban Zaldua, Patxi Zubizarreta... Baina haiena baino garrantzitsuagoa izan zen hamarnaka ikasle/idazle "anonimoren" ekarpena eta lana, Zintzhilik aldizkariaren benetako oinarria.