Europa berriz ere isilik dago

Europa csendes, ujra csendes

Sandor Petöfi

euskaratzailea: Joseba Sarrionandia

Europa berriz ere isilik dago,

Erreboltak apaldu ziren...

Zer lotsagarria den lasaitasun horretan

Herrien esklabotasuna!

Hungariar herria bakarrik utzi dute

Beste herriek, kobardeok,

Lepoan katea daramatenok

Hungariarra besterik ez da harmatzen.

Horregatik etsituko dugu orain,

Horregatik tristatuko gara?

Alderantziz, oi gure aberria, horrexek

Emanen digu arnasa berria.

Bakardadeak altzatuko du gure gogoa,

Kriseiluaren argia garelako,

Besteak bakean lo daudelarik

Ilunbeak desegiten dituen argia!

Gure argia gau beltz infinitoaren

Erdian arreko ez balitz

Munduan bizitzarik gehiago ez dagoela

Pentsatuko lukete zeruan.

Begira egiguzu, askatasuna, ezagutu egizu

Zeure herria: besteak ez dira ausartzen

Ezta ere malkorik isurtzen

Guk geure odola emanen dizugu

Zer egin behar dugu zure alde,

Askatasuna, egiten ez dugunik?

Infidelitate haro hauetan

Geu izan gara zeure azken aldekoak.

In Joseba Sarrionandia, Hezurrezko xirulak. Elkar, 1991.