Desirak

F.E.

Ilaun bat zelatu

igon gainera eta hegoaizearen bufadaz

munduak zeharkatu

hori nahi izango huke.

Gauaz, ilargiari begiratu

haren orbainetan izaki trufosen

formak ezagutu, haiei keinuak egin

eta kafesnea hartutakoan

bihotz lasairik ohera itzuli,

hori nahi izango huke.

Eskimalen egonarriz

hire bihotzeko zulo gaitzen aurrean

eseri, eta zaurietatik

maitasun ametsak nola ixurtzen zaizkikan

begiratu ixil-ixila,

horixe nahi izango huke.

Txantxarra desterraturik legokeen

mundu batetan bizi nahiko huke,

eta estultizia, eta begirakun zeharrak,

axota guztiek amandre ipuin durduzagarriak

izkribatzen baino ez lekiketen mundu batetan,

hainbeste ardura alperreko

eta hainbeste expediente izoztu ezagut ez zezan

mundu batetan.

Hitzak azpildurarik gabeko brusak

izan litezen mundu batetan, denok jazteko,

elur pellak haurren eskuetan sekulan urtu ez litezen

munduan

dena bailitzateke punpaka dostakin alegera bat.

Nahi izatez

matematikako prolemak galerazita nahiko hituzke

(bai eta beste andanaño bat ere)

agureak atsoen ixilik katxabekin makil dantzan ikustea

gaueko karrakaldo deslaientzat xendera seinaleztatuak

—izar hautsez—

udaletxeek irri eroriak biltzeko zerbitzua antola lezateela

egunkaria irakurtzean —oh!— galdu duzuna berreskuratzeko

zikuina kanpandorregetuendako sindikatu puxanta

Donibane gauetan txingarretara

erori diren umekondo trauskilei erakusteko

igela jauzkalari brigada azkar bat

mentazko karamelu urteetan lezaketeenak iraun...

Tajugabea arau.

Ilaun bat zelatu

munduak zeharkatu...