Izoztaldeak

Omar Nabarro

                          I

Beti negua deneko eremu zurietan

labantzen da —gogoaren begiak esku bakarra bailiran—

isiltasuna.

Itsasoa ere zuria deneko elur mortuetan

irristatzen da ekia planetan behera

isilik

urak azulen diren aerografozko bakarraldeetara

hara

non

mutua den oro.

                          II

Eta gogoetaren begiek laztantzen dute paisaia

hotsik eragin barik

haizeak bera haizea denik ere jakin barik

ez bait du osto-zuhaitzik dardaraziz

haizearena egiten

gogoetaren begia dira dardaraz

izoztetan pausatzen

zuriduraren oihartzunen atzean

Eta haize deritzagu hunkidurari.

                          III

Urdina da han gaua

Urdina baita

Etorri ez diren oren nini bakarra

Urdina inon ez diren hartzen narrua ere.

                          IV

Diamantea amesten dut izotz ortzemugan

eta dena urtzen da

ekia biderkatu egiten bait da

beirazko poliaiztoaren aurpegietan

ahoetan ebakita

Bestela zerk hedarazten du

nagusitzen ari den gorridura

eta beronen kara ñabarrak

iceberg-etako urdin ubela

izotz-ertzean iragazten den azula

beti ere laster ferdea datekeen errainua

eta berezko uhin zirkularretako bits zuriagoa.

                          V

Isiltasunean datza neguaren segeretua

—altzairuaren formula hoztua,

bero barik erretzen den sua—

isiltasuna zuhaitzik astintzerik ez duen

haizearen eskutsak bait dira,

zeintzuetan higidura barik

kristaldurik dirauen zeropekoaren gardentasun ekuruak.

                          VI

Beherago

izeiez izeturiko harkaitzak,

lehen basoak,

katagorriak izan zituzkeetan

adar eta enbor kraskatuzko oheantzeak

zeintzuetan

haize txistukaria dabilen

amildegiarteko labirinto ia geometrikoetan lez.

                          VII

Baina sua beherago da

esmeralda eta koralek

ardoa eta ferdedura isuri duten

urpetako urgainetan.

                          VIII

Ordoki submarinoa

Gardentasuna hari duen oihal ikustezina

Kristalezko muin mutua

Iz-Basoa

Itsaso