Azaroko heriotza: lau ohar

E. Olasagasti

Zakur bat negarrez katuen erresuman

mila jostorratz harilkatzen

bizitzea, pauso bakoitza urratsa bihurtu

poema, gizon bakar bat bidean

natura, ikaragarria eta

hortzeko marratik gora argia.

Zer agintzen du ?

                    * * *

Denbora gelditu egin da

kostaldean Matxitxakoraino

gelditu da

Kopeta zabaleko herria, barruan

sabelean, harriak borrokan gauzka

                    * * *

Oinezko arrantzaleak kostarantz abiatu dira

Haize fuertea zegok diote

Denbora beste behin gelditu da

zure izenean eta egunez

aditu

kantoiak umeenak

aitonen begirada aurrean

espaloietan jolasten dute

hezur zuri bat belontzi masta bihurtuz

                    * * *

Gaur itsasbazterrean lur arrotz eta urrun bat dakus

bidean gizon bat ito da.

Pakerik ez, itsasoa berde eta

gure begirada grisa den bitartean

Bi bat da.

Eta instant horretan

zenbat sufritzen duen batek

nola, bere buruaz beste eginaz

egunak egunero

urtean hirurehun eta hirurogeitazazpi

aldiz bezala.

Gizona triste paratzen da

bat batean

harridura beirapean datza entendidu ezinik

berriro begira bere odolaren kolorea.