James Joyce

        James Joyce.k 1914.an idatzitako kondu labur batetatik (Giacomo Joyce) hartutariko pasarteak.

Padua itsasoa baino areago. Erdi haro isiltsua, gaua, historiaren gerizpea lotan Piazza delle Erbe.n hilargi pean. Hiria lotan. Hibaiondoko kale ilunean hegal petan, puten begik zelatan fornikatoren zai. Cinque servizi per cingue franchi. Sentimenezko uhin ilun bat, beste behin, eta berriro, eta berriro.

                Ene begiek huts dute egiten ilunetan, ene begiek huts

                Ene begiek huts dute egiten ilunetan, maitea.

        Berriro ere. Aski amodio iluha, antsietate iluna. Aski. Iluna. Arrastiria. Piazza guruztatzen. Arrats grisa jeisten ari da larre salbiaberdetara, isilkiro erantziz iluna eta ihintza. Berak amari jarraikitzen dio grazi traketsez, behorra behorkada bideratuz. Arrastiri grisak modeatzen ditu emeki anka mehe eta ongi osatuak, lepoa xume mugikoi, burhezurra fina. Iluntzia, bakea, edertasunaren itzala... Arre! joan! Arre!

        Aita-alabak txirristaka muinoan behera, kukumutxuka toboggan batetan: Turko Handia eta bere harenma. Sonbreilu eta jake hestuak, botak lotunk kurios haragi-epelezko fita gainera, gona motza tiran belaunetako korapilo biribilek. Diztira xuri bat: maluta bat, elur maluta bat:

                Eta bera berriro ateratzen denean

                Nadin han, ikustekoz!

        Presaka ateratzen naiz tabakotegitik eta dei egiten diot. Bueltatzen eta geratzen da lekzio, ordu, lekzio, orduekin nahasmendutariko hitzak entzutearren: eta astiro bere masaila zurbilak gainezkatzen dira argi opalo satsu batez. Ez, ez, ez zaitez beldur izan!

        Mio padre: egitadarik xingleenak bereizpenez burutzen ditu. Unde derivatur? Mia figlia ha una grandissima ammirazione per il suo maestro inglese. Agurearen arpegia, ederra, gorriztatua, judutar arrasto nabarmenekin eta bibote luzez, neri begira jartzen da muinoan jeisten garen bitartean. Ene! Ze ongi adierazia: kortesia, ongura, konfiantza, kuriositatea, susmoa, naturalitatea, zahartzaroko ezina, konfidentzia, zintzotasuna, gizabidea, abisua, pathos.a, gupida, nahasdura perfekta. Loiolako Iñazio, laster, zatoz ene laguntzan!