—Irudiak—

Agur hego haize, agur

Pello Otxoteko

Errekak azken txipil-txapla,

amurrainek azken jauzia,

neska gazteek azken aldiz

desorraztuko dute adatsa,

makalak zabunkatuz

azken agurra Adonis gazteari.

Eta gu poliki-poliki ximurtuko gara

eta gure adarrari azken agurra eginez

lurreratuko gaitu gure azken hego haizeak

eta begietan azken malkoekin agurtuko dugu haize hegoa.

Eta lurrean tapiza gisa

Boreasen etorrera apainduko dugu.

Eta Boreas bizardunak

bere hats hotzarekin

gerize azpitik antsigarra esnatuko du.

Zurbila da berpiztea

mingotsa heriotza,

biziaren arnas galduaren itzala

zurbila da

baina ez iluna;

neketsua bilakatzen zaigu

gure neguaren sarrera,

baina negua

haizearen norabidearen

adaketa xumea da.