—Iparraldeko poesigintza—

Manex Erdozainzi-Etxart

(1934-1984)

Ttortta ttortta ala burrustan

hirekin narabilak oren luzeak, luzeak

egunak eta egunak, ezin aspertua

borroka gogorra bere beroan

eramaten duen herri honen betan

niabilak goibel, urduri, isil-isila

hire musika hautsian murgildua

                                        xenderaz-xendera

                                        gaur...

kalez-kale umezurtza erne doa

tiroz hil eguneraino

mendiz-mendi bere aita zihoan bezala

aitaren orroimenaz

begi bustiak

amaren babesean

xukatzera

kalez-kale

umezurtza

doa...

borrokaren bakartasun latzean

haiduru dagoen andre baten intziriak

tiroak eta gartzelak

umezurtzen negarrak

lagunen berriak

lagunen irriak

galtzen dira

kalez-kale...

Noizetik noizera

niabilak kezkati

nork zituen nahasi

erloien orduak?

Nork zion ebatsi

herri alai honetan

azkorria gauari?

Nork zuen hil zorian

gure herri zahar hau

maitasun gabez ukatu?

Nola euri uharrak

gau izartsuen lilluran...

halaxe borrokaren ukaldiak

egunak gauean galdu dituen

herri zahar honen

hezur-mamietan!

Herri zahar honen

borroka erraietan

ahanzten ziazkidak

munduko erlojuaren

oren banatuak...

noizetik noizena...

(Herri honen erraietan)