—Itz-Neurtuz—

Nere txokoa

Anai Olabeaga'tar I. Salletarra

                 I

Zugaitz-puntan erne zegon txoria

ikusi dut gaur berritxu.

Txioka agurtu du egun-sentia;

atsegiñ betez inguru.

                 II

Esnatu dit neri ere biotza,

bultzaka suma dut baitan,

goratu dezadan nere txokoa,

olerki puska berritan.

                 III

Ene txokoa!... nola nik abestu?

Lantegi aundi, kebide,

labe arrigarri, ke beltza usu...

Orixe det aurrez-aurre.

                 IV

Urrutian eusko-mendien isla;

maldan etzin soro orlegi.

Bertago lurrunezko odei zuria

goraka ariñ, biurriki.

                 V

Erdian, Nerbion ibai zabala

olio-begi du ugari;

itxasontzi, gabar, batel, txalupa,

Bizkaiko urre-iturri.

                 VI

Goizetik lantegi-txistu bizia

zorrozki langille deika;

arrobi-dunbots, ontz-karraxia,

trenen burrunba, zarata.

                 VII

Giza-seme ozte, jantzi koipetsuz,

lanian ariñ, lasterka.

Margo urdiñarre, beltza jabetuz,

emen, or, an, sua, garra.

                 VIII

Labe aundietan garaiz arrausi

ago-sapai gori dakust;

txingar-lerde dario ugariki,

ingurun galda zabalduz.

                 IX

Burni, su-suge, zearka lurrian

giz-oñei kosk-egin naiez.

Burni-urtu dirdiz erretenetan,

bazter danak txirtxir-otsez

                 X

Bessemer-ontzi galtzairu-egille

izar igezlariz bete,

eguzki-txiki, gau illun garaille,

aurki gaindua ala-ere.

                 XI

Edonun burni-meagune meta,

burni multzo lo-etzanik;

burni-bide, burni-gurdi, zubi ta

lankai, tresna zar, bildurik.

                 XII

Ene txoko!... benetan burni txoko!

Su, ke, autsa bizi-lagun.

Noizian-bein Zure zeru-urdin,

Jainko! ni egiñik itxarodun!